Davron Kabulov noqonuniy gaz mojarosiga izoh berdi
"Bizning mutlaqo aybimiz yoʻq demoqchimasman. Lekin 382 million soʻm katta raqam. Biz 25 yilda ham buncha gaz yoqmaymiz", deya taʼkidlagan Kabulov.
Taniqli boshlovchi Davron Kabulov otasining tabiiy gazdan qarzdorligi boʻyicha sudlangani boʻyicha xabarni izohladi.
Bu haqda ijtimoy tarmoqlar va OAVlar Bosh prokuratura maʼlumotiga asoslangan holda eʼlon qilgandi.
Davron Kabulovga koʻra, uning otasiga tegishli mehmonxona oʻz faoliyatini boshlaganda, deyarli barcha hujjatlarni qonun doirasida rasmiylashtirgan.
"Biz gazlashtirish boʻyicha hujjatlarni 98 foiz amalga oshirdik. Faqatgina shaxsiy hisob raqam ochish va uni gaz taʼminoti idorasiga sinxronizatsiya qilish ishlari boʻlmagan, xolos. Men ham, otam ham gaz mutaxassisi emas. Gaz uskunalariga ham, hisoblagichga ham tegmaganmiz. Gaz kelguniga qadar elektr plitalardan foydalanganmiz. Eng qizigʻi, gazni bor-yoʻgʻi 2,5 oygina ishlatdik xolos.
Bizning yagona aybimiz, gazlashtirish ishlarini toʻliq tushunmaganimizdir. Shunda ham eʼtibor bering, qisqa muddat ichida qanaqasiga 382 million soʻmlik gazni shunchaki ishlatib yuborish mumkin?!", deydi Kabulov. Boshlovchiga koʻra, reyd tadbirlarida avval" Hududgaz" xodimi kelib, mehmonxonani tekshirgan, ammo hech qanday ogohlantirish bermagan. "Keyinchalik ushbu xodim pora bilan qoʻlga tushdi, degan xabarlarni oʻqidim (bu haqda rasman eʼlon qilinmagan - tahririyat). Xodim tabiiy gaz noqonuniy ishlatilayotganini aniqlagan boʻlsa, ogohlantirishi kerak emasmi? Bunaqa jarayondan avval oʻtmaganmiz" deya vaziyatni izohladi Kabulov.
Uning aytishicha, otasi Ravshan Kabulov maʼlum vaqt AQSh safarida boʻlgani uchun hujjatlarda ayrim kamchiliklar boʻlgan.
"Bizning mutlaqo aybimiz yoʻq demoqchimasman. Lekin shunda ham 382 million soʻm katta raqam. Biz 25 yilda ham buncha gaz yoqmaymiz. Men metan zapravka emas, mehmonxona ochdim. Shunday boʻlsada, tergovchining ichkarida ogohlantirishidan keyin 382 mln soʻmni Bosh prokuratura depozit hisobiga toʻliq oʻtkazdik. Sud uning 37 mln soʻmini ortiqcha hisoblangan deya qaytarib berdi.
Prokuratura xabarida noaniqliklar bor. Masalan gaz boʻyicha reyd tadbirlari 2023 yil dekabrda emas, oktabrda oʻtkazilgan. Bu jiddiy xato", deya taʼdkilagan Davron Kabulov.
Eslatib oʻtamiz, Bosh prokuratura maʼlumotiga koʻra Ravshan Kabulovga tegishli mehmonxona jami 907.558 kub metr miqdoridagi 344 mln. 872 ming soʻmlik tabiiy gazdan yashirin ravishda foydalangan va zarar toʻliq qoplangan.