Uzbekistan Airways Eron va Iroq hududini chetlab oʻtgan holda parvozlarni amalga oshiradi
Yana ikki aviakompaniya Yaqin Sharqdagi vaziyat sabab Oʻzbekistonga reyslarni vaqtincha toʻxtatdi.
Uzbekistan Airways Eron va Iroq hududini chetlab oʻtgan holda parvozlarni amalga oshiradi.
Fuqaro havo kemalari parvozlarining xavfsizligini taʼminlash maqsadida, 2024 yil 2 oktabrdan boshlab, Oʻzbekiston Respublikasi Fuqaro aviatsiyasi agentligining koʻrsatmasiga muvofiq, Uzbekistan Airways Iroq havo hududi va Eron havo hududining gʻarbiy qismini aylanib oʻtgan holda, aniq koʻrsatmaga qadar muntazam parvozlarni amalga oshirishini maʼlum qiladi.
"Taʼkidlash joizki, Uzbekistan Airways parvozlarning maksimal xavfsizligini taʼminlash uchun muqobil yoʻnalishlardan foydalangan holda Toshkent - Tel-Aviv - Samarqand/Toshkent yoʻnalishi boʻyicha muntazam aviaqatnovlarni amalga oshirishni davom ettiradi" deyiladi xabarda.
Bundan tashqari, "Flynas" va "Qeshm Air" aviakompaniyalari Yaqin Sharqdagi vaziyatning keskinlashuvi va havo hududining bir qismi yopilishi munosabati bilan Oʻzbekistonga parvozlarni vaqtincha toʻxtatgan.
