Durov Telegramdagi jinoyatchilar maʼlumotlari rasmiylarga taqdim etilayotganini maʼlum qildi
Oʻzbekiston rasmiylaridan hozircha ushbu masalada soʻrov kelib tushmagan.
Telegram messenjeri asoschisi Pavel Durov jinoyatchilarning IP-manzillari va telefon raqamlarini oshkor qilish anchadan beri yoʻlga qoʻyilganini maʼlum qildi. Bu haqda u oʻzining Telegram-kanalida yozgan.
"Maxfiylik siyosatimizga koʻra, 2018 yildan beri Telegram koʻpchilik mamlakatlardagi jinoyatchilarning IP-manzillari va telefon raqamlarini rasmiylarga oshkor etishi mumkin edi.
Tegishli aloqa liniyalari orqali biz qonuniy soʻrov olganimizda, biz uni tekshiramiz va xavfli jinoyatchilarning IP manzillari yoki telefon raqamlarini oshkor qilamiz. Bu jarayon ancha oldin mavjud edi", — dedi Durov.
"Misol uchun, Braziliyada biz 2024 yilning birinchi choragida (yanvar-mart) 75 ta, 2-chorakda 63 ta va 3-chorakda 65 ta yuridik soʻrovlar boʻyicha maʼlumotlarni oshkor qildik. Eng yirik bozorimiz boʻlgan Hindistonda biz 1-chorakda 2461 ta, 2-chorakda 2151 ta va 3-chorakda 2380 ta yuridik soʻrovni qondirdik", deya yozadi messenjer asoschisi.
Oʻzbekistondan Telegramdagi jinoyatchilar maʼlumotlari masalasida soʻrov kelib tushmagan.
Eslatib oʻtamiz, Durov ayni paytda Fransiyada boʻlib turibdi. U avgustda qoʻlga olingandi.