Toshkent Markaziy Osiyoning eng qimmat shaharlaridan deya topildi
Dushanbe va Ashxobod kabi shaharlar roʻyxatga kiritilmagan.
2024 yil boshida eʼlon qilingan Numbeo portali maʼlumotlariga koʻra, Olmaota Markaziy Osiyoning eng qimmat shaharlari reytingida yetakchilik qilmoqda. Toshkent esa uchinchi oʻrinni egallagan.
Numbeo oʻz reytingini 2009 yildan beri yuritib keladi. Reytinglar ijaraga beriladigan uy-joy narxi, oziq-ovqat, umumiy ovqatlanish narxlari va boshqa omillarni hisobga olgan holda foydalanuvchi sharhlari asosida tuziladi.
Olmaotadan keyin reytingda Ostona ikkinchi, Toshkent va Bishkek uchinchi va toʻrtinchi oʻrinlarni egalladi.
Biroq, Numbeo foydalanuvchilarining sharhlari cheklanganligi sababli Dushanbe va Ashxobod kabi shaharlar roʻyxatga kiritilmagan.
Ammo, agar nafaqat Markaziy Osiyoni, balki butun Osiyoni oladigan boʻlsak, Qozogʻiston shaharlari elliktalik reytingdan joy olgan. Umumiy reytingda Singapur eng qimmat shahar boʻlib chiqdi.
Osiyo shaharlari reytingiga jami 86 ta shahar kiritilgan.