Tovuq goʻshti narxi oshishi mumkin
1 oktabrdan yangi soʻyilgan yoki muzlatilgan parranda goʻshtini Oʻzbekistonga olib kirishda belgilangan bojxona imtiyozi bekor qilinadi.
Oʻzbekistonda tovuq goʻshti qimmatlashishi mumkin.
2024 yil 1 oktabrdan yangi soʻyilgan, sovitilgan yoki muzlatilgan uy parrandasi goʻshti va qoʻshimcha ozuqabop mahsulotlari (butun goʻsht, qanot, bel, boʻyin, okorochok, golen, son, qiyma va teri) Oʻzbekiston hududiga olib kirishda belgilangan bojxona boji boʻyicha berilgan imtiyoz bekor qilinadi. Bu parranda goʻshti narxiga taʼsir etishi mumkin.
Mazkur oʻzgarish joriy yilning 27 iyun kuni prezident tomonidan qabul qilingan "Parrandachilik sohasini yanada qoʻllab-quvvatlash, zamonaviy genetik texnologiyalar va kooperatsiya tizimini joriy etish chora-tadbirlari toʻgʻrisida"gi qarorida belgilangan.
Shuningdek, 2030 yil 1 yanvargacha parrandachilik mahsulotlari ishlab chiqaruvchi tadbirkorlik subʼektlari yuridik shaxslardan olinadigan yer soligʻini (ekin maydonlaridan tashqari) toʻlashdan ozod etiladi.
