Zeekr xorijga "kulrang sxemalar" boʻyicha chiqarilgan elektromobillarni oʻchirib qoʻyadi
Kompaniya cheklovlar 2024 yil 15 iyuldan keyin ishlab chiqarilgan elektromobillarga nisbatan qoʻllanilishi haqida ogohlantirdi.
Xitoyning Zeekr kompaniyasi xorijga "kulrang sxemalar" boʻyicha olib kelingan elektromobillarni oʻchirishni boshlaydi.
Rossiyadagi Telegram kanallar baʼzi avtomobillar masofadan bloklanishi haqida ogohlantirmoqda.
Iyun oyida kompaniya noqonuniy eksport qilingan avtomobillarga qarshi choralar koʻrish rejasini eʼlon qilgan edi. Zeekr Xitoy ichida foydalanish uchun moʻljallangan, ammo boshqa mamlakatlarga olib ketilgan uskunalarni bloklamoqchi boʻlgan. Maʼlumotlarga koʻra, faqat Rossiya emas, butun dunyoga noqonuniy chiqarilgan elektromobillar oʻchiriladi.
Kompaniya cheklovlar 2024 yil 15 iyuldan keyin ishlab chiqarilgan elektromobillarga nisbatan qoʻllanilishi haqida ogohlantirdi.
Agar kompaniya ularni shartnomada koʻrsatilgan xizmat koʻrsatish hududidan tashqarida aniqlasa yoki ishlab chiqaruvchi tomonidan ruxsat etilmagan SIM-kartalardan foydalanayotganini aniqlasa, avtomobil tizimi ogohlantirish beradi va mashinani Xitoyga qaytarishni taklif qiladi.
Shu bilan birga, yetkazib beruvchilar ishlab chiqaruvchining choralariga qarshi kurashishga tayyor. Rossiyalik dilerlar elektromobil egalariga 75 ming rubllik narxda maxsus bloklarni taklif qilishdi, bu esa avtomobilni asosiy hisobdan uzib qoʻyadi. Biroq, bunday yechim qancha vaqt ishlashi nomaʼlum, ishlab chiqaruvchi ushbu qurilmalarni chetlab oʻtishga harakat qilishi mumkin.
Autostat maʼlumotlariga koʻra, sakkiz oy ichida Rossiya Federatsiyasida 5559 ta Zeekr avtomobili roʻyxatga olingan, bu 2023 yilning shu davriga nisbatan 76 barobar koʻpdir. Bu davrda Rossiyaga jami 12689 ta yangi elektromobil sotilgan. Agar bloklansa, ularning kamida uchdan bir qismi oʻchishi mumkin.
