Botir Zohidov aslida kim?

Botir Zohidov 2024 yil 23 sentabrdan Kambagʻallikni qisqartirish va bandlik vaziri lavozimida ish boshladi.

U 1982 yil 24 iyulda Toshkent shahrida tugʻilgan. 2003 yilda Toshkent moliya institutini, 2008 yilda esa Bank-moliya akademiyasini tamomlagan.

2004-2022 yillarda Markaziy bankda ishlagan, u yerda mutaxassislikdan toki raisning birinchi oʻrinbosarigacha boʻlgan yoʻlni bosib oʻtgan.

(Ayrim maʼlumotlarga koʻra, bank sohasida 20 yillik tajribaga ega, biroq Markaziy bank tizimida 2009 yildan faoliyat yurita boshlagan).

Markaziy bankda, xususan, valyuta ayirboshlash va konversion operatsiyalar maxsus boshqarmasi boshligʻi lavozimida ishlagan.

Zohidov 2017 yil 14 avgustda Markaziy bank raisi oʻrinbosari etib tayinlangan. 2020 yil 27 mart kuni Markaziy bank raisining birinchi oʻrinbosari etib tayinlangan.

Uning zimmasiga kredit tashkilotlari prudensial nazorati, litsenziyalash va ruxsat berish tartiboti, kredit tashkilotlarini inspeksiya qilish, kredit tashkilotlari faoliyatini tartibga solish, kredit axborotining davlat reyestrini yuritish, moliyaviy savodxonlikni oshirish va bank mutaxassislarini qayta tayyorlash, bank xizmatlari isteʼmolchilarining huquqlarini himoya qilish yoʻnalishlari nazorati yuklatilgan.

2022 yil 19 sentabrda Toshkent shahar Shayxontohur tumani hokimi etib tayinlangan.

Zohidovning moliya va mahalliy davlat hokimiyati bilan bogʻliq boshqaruv tajribasi uni vazir lavozimiga tavsiya etilishi uchun asos boʻlgani taxmin qilinadi.

Botir Zohidovga kambagʻallikni qisqartirish va aholi bandligini taʼminlash dasturini ishlab chiqish topshirildi. Unga yuklatilgan aniq vazifalardan biri – 2024 yilda 500 ming va 2025 yilda yana 1 million kishini kambagʻallikdan chiqarish boʻlib, bu hukumatga tegishli ulkan rejalarning bir qismidir. Shuningdek, Prezident maxsus yigʻilishda Zohidovga vazirlik faoliyatini yangi bosqichga olib chiqishni topshirgan. Jumladan, Mahallabay agentligi tugatilishi munosabati bilan, uning vazifalari (jumladan, hokim yordamchilari ishini boshqarish ham) ushbu vazirlik zimmasiga oʻtadi.

Botir Zohidovning moliyaviy sohadagi professionalligi va katta tajribasi, shuningdek, hokimlikda ishlagan payti erishgan natijalari inobatga olinsa, undan vazir sifatida muvaffaqiyatli islohotlarni amalga oshirishini kutish mumkin.

Hammasini vaqt koʻrsatadi.