Fransiya davlat qarzi 3 trillion yevrodan oshdi
Mamlakat bosh vaziri Mishel Barne iqtisodiyot ogʻir ahvolda ekanini maʼlum qildi.
Fransiyaning davlat qarzi 3 trillion yevrodan oshdi, mamlakat iqtisodiyoti esa ogʻir ahvolda ekani aytildi.
Bu haqda respublika bosh vaziri Mishel Barne France 2 telekanalida maʼlum qilgan.
"Mamlakatimiz juda ogʻir vaziyatni boshdan kechirmoqda", dedi u, "Fransiyaning qarzi 3 trillion yevroni tashkil etadi va unga xizmat koʻrsatish uchun yiliga 50 milliard yevrodan koʻproq mablagʻ sarflanadi".
Telekanal maʼlumotlariga koʻra, Fransiyaning davlat qarzi deyarli 3,16 trillion yevroni tashkil etadi.
Barnening taʼkidlashicha, "hukumat na davlat qarzining koʻpayishiga, na ekologik talablarning kamayishiga yoʻl qoʻymaydi". Hukumat xarajatlarni nazorat qilish va pensiya islohotini saqlab qolishga intiladi, deya qoʻshimcha qildi u.
Uning soʻzlariga koʻra, sogʻliqni saqlash tizimi va immigratsiya nazoratiga ustuvor eʼtibor beriladi.
Hukumat rahbari badavlat fransuzlar daromadiga soliqlar oshirilishini istisno etmadi. "Men eng badavlat vatandoshlardan iqtisodiy vaziyatni normallashtirish choralarida ishtirok etish talab qilinishi mumkinligini istisno qilmayman", dedi u.
Avvalroq Yelisey saroyi tashqi ishlar vaziri lavozimini Jan-Noel Barro egallagan yangi vazirlar mahkamasining tasdiqlangan roʻyxatini eʼlon qilgan edi.
Sebasten Lekornu Qurolli Kuchlar rahbarligini saqlab qoldi, Bruno Retaillot esa Ichki ishlar vazirligi rahbari lavozimini egalladi.
Iqtisodiyot vaziri lavozimini 33 yoshli Antuan Armand egalladi. 23 sentabr kuni Vazirlar kengashining yangi tarkibdagi birinchi yigʻilishi boʻlib oʻtadi.