Shavkat Mirziyoyev "Markaziy Osiyo-Germaniya" sammitida qator tashabbuslar bilan chiqdi
Mintaqani Yevropa bilan bogʻlovchi muqobil transport yoʻlaklarini rivojlantirishga Yevropa institutlarini jalb etish taklif etildi.
Prezident Shavkat Mirziyoyev “Markaziy Osiyo – Germaniya” ikkinchi sammitida nutq soʻzladi va qator takliflarni ilgari surdi.
2025 yil “Markaziy Osiyo – Yevropa Ittifoqi” formatidagi navbatdagi sammit Oʻzbekistonda oʻtkaziladi.
Oʻzbekiston rahbari quyidagilarni taklif etdi:
-Ustuvor sohalarda dasturiy tadbirlarni qamrab olgan uzoq muddatli Hamkorlikni rivojlantirish konsepsiyasini ishlab chiqish uchun “Markaziy Osiyo – Germaniya” tahliliy markazlari forumini taʼsis etish. Uning birinchi yigʻilishi Xivada oʻtkaziladi.
-Markaziy Osiyo mamlakatlari va Germaniya sarmoyaviy va texnologik hamkorligini kengaytirishning yoʻl xaritasini ishlab chiqish;
-chegara hududlarida yaratilayotgan alohida iqtisodiy va sanoat zonalaridagi hamda mintaqaviy ahamiyatga ega yirik infratuzilma loyihalarni amalga oshirishga yetakchi nemis kompaniyalari va banklarini jalb etish;
-doimiy biznes-muloqot maydonchasi – “Markaziy Osiyo va Germaniya” investor va tadbirkorlari kengashini ishga tushirish;
-investitsiyalarni ragʻbatlantirish va himoya qilish toʻgʻrisidagi koʻp tomonlama hukumatlararo bitimni qabul qilish.
-Energetika vazirliklari, korporatsiyalar, operatorlar, ilmiy tashkilotlar, loyiha institutlari va tarmoq ekspertlarini jalb etgan holda Markaziy Osiyo mamlakatlarining Germaniya bilan Energetik muloqotini yoʻlga qoʻyish.
-Atrof-muhit va iqlim oʻzgarishlarini oʻrganish boʻyicha Markaziy Osiyo universiteti bazasida qoʻshma taʼlim dasturlari va ilmiy almashuvlarni amalga oshirish;
-suvdan oqilona foydalanishda nemis texnologiyalarini joriy etish, irrigatsiya tizimlarini modernizatsiya qilish, bioxilma-xillikni saqlash, mutaxassis-ekologlarni tayyorlashda hamkorlik qilish.
-Markaziy Osiyoni Yevropa bilan bogʻlovchi muqobil transport yoʻlaklarini rivojlantirishga Yevropa institutlarini jalb etish.