Vʼetnamda "Yagi" toʻfoni oqibatida 143 kishi halok boʻldi
Mamlakat shimolidagi suv toshqini butun bir qishloqni yuvib ketgan.
Vetnamdagi "Yagi" toʻfoni oqibatida 143 nafar kishi halok boʻldi, deb xabar bermoqda AFP mahalliy hukumat maʼlumotlariga asoslanib. Yana 58 kishi bedarak yoʻqolgan.
Associated Press`ning aniqlik kiritishicha, Vetnam shimolidagi suv toshqini butun bir qishloqni yuvib ketganidan keyin qurbonlar soni ortgan. Natijada kamida 16 kishi halok boʻldi, yana oʻnlab kishilar bedarak yoʻqoldi.
Qishloq xoʻjaligi vazirligi yomon ob-havo tufayli 210 ming gektarga yaqin ekinlar nobud boʻlganini maʼlum qildi. 700 dan ortiq kishi jarohatlangan.
Avval Vetnam shimolida toʻfon 375 metrlik Fong Chau koʻprigini buzib yuborgan.
Janubi-Sharqiy Osiyoni 1 sentabr kuni "Super Yagi" toʻfoni qamrab oldi. Toʻfon Filippin, Xitoy va Gonkongda ham oʻlimga sabab boʻldi.
Tabiiy ofatlar xavfini boshqarish va kamaytirish boʻyicha Filippin milliy kengashi tabiiy ofat keltirgan zararni 1,36 milliard Filippin pesosi (27,57 million dollar) deb baholadi.
"Yagi" toʻfoni bu yil Osiyodagi eng kuchli siklon boʻlib, shamol tezligi soatiga 203 kilometrga yetmoqda.