Qoramollar orasida jiddiy kasallik uchrayotgani haqida audio tarqatgan fuqaro ogohlantirildi
Qishloq xoʻjaligi vazirligiga koʻra, soʻnggi olti oy davomida chorva mollarida biror bir kasallik aniqlanmagan.
Qoramollar orasida xavfli kasallik uchrayotgani haqida xabar tarqatgan fuqaro ogohlantirildi.
Ijtimoiy tarmoqlarda nomaʼlum shaxs tomonidan qoramollarda yuqumli kasallik tarqalgani tufayli har joydan ham goʻsht sotib olmaslikka chorlovchi audioxabari turli muhokamalarga sabab boʻldi.
Holat Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi hamda tegishli idora vakillari hamkorligida atroflicha oʻrganildi.
Oʻrganish natijalariga koʻra, soʻnggi olti oy davomida hududdagi chorva mollarida biror bir kasallik aniqlanmaganligi, qoramollar sogʻlom parvarish qilinayotgani aniqlandi.
Xabar tarqatgan audioxabar egasi Fargʻona viloyati, Buvayda tumanida istiqomat qiluvchi fuqaro F. T. ekanligi maʼlum boʻldi. Fuqaro F.T. ga yolgʻon xabar berish, vahima uygʻotuvchi asoslanmagan maʼlumot tarqatish uchun qonunchilikda jiddiy jazo borligi tushuntirildi hamda mutasaddi idoralar tomonidan ogohlantirildi.
"Maʼlumot oʻrnida, Qishloq xoʻjaligi vazirligi tizimga doir har qanday yoʻnalishda jiddiy nazoratga olgan. Shuningdek, chorvachilikda yangi va zamonaviy yondashuvlar, qoramollarni sifatli yetishtirish, ularni ehtimoliy kasalliklardan saqlash boʻyicha ham doimiy kuzatuv oʻrnatilgan", deyiladi vazirlik xabarida.