Yangiyoʻldagi yogʻ-moy korxonasiga ish qoʻzgʻatilib, chora koʻrildi
10 tonnadan ziyod sovun tasdiqlangan grafik rejasi asosida muddatlar va hajmlarda birjaga qoʻyilishi koʻrsatilgan boʻlsada, mahsulot umuman sotuvga chiqarilmaganligi aniqlangan.
Raqobat qoʻmitasi "Yangiyo‘l yog‘-moy" nisbatan tegishli chora qoʻlladi. Bunga uning manipulyatsiya harakatlari sabab boʻlgan.
Vazirlar Mahkamasining 2020 yil 18 martdagi 170-sonli qarori bilan tasdiqlangan Birja savdolarida yuqori likvidli va monopol turdagi mahsulotlarni sotish tartibi toʻgʻrisidagi nizomning 29-bandiga muvofiq, Monopoliyaga qarshi kurashish organi doimiy ravishda birja narxlari monitoringini oʻtkazib borishi belgilangan.
Monitorning oʻtkazish natijasida, “YANGIYO‘L YOG‘-MOY” AJ tomonidan 2024 yil fevral oyida birja savdolariga 10 tonnadan ziyod 250 mln soʻmga yaqin sovun mahsuloti tasdiqlangan grafik rejasi asosida muddatlar va hajmlarda qoʻyilishi koʻrsatilgan boʻlsada, ushbu mahsulot umuman sotuvga chiqarilmaganligi holatlari aniqlandi.
Maʼlumot oʻrnida, Vazirlar Mahkamasining 2020 yil 18 martdagi 170-sonli qarori bilan tasdiqlangan Nizomning 311-bandi 18-xatboshisida, “Yuqori likvidli va (yoki) monopol mahsulotlarni toʻgʻridan-toʻgʻri shartnomalar boʻyicha sotish” harakatlari manipulyatsiya deb hisoblanadi.
Yuqoridagilarga muvofiq, hududiy boshqarma tomonidan “Raqobat toʻgʻrisida”gi Qonunning 29-moddasi va Vazirlar Mahkamasining 170-sonli qarori bilan tasdiqlangan Nizom talablari buzilishi alomatlari bilan “YANGIYO‘L YOG‘-MOY” AJga nisbatan ish qoʻzgʻatilib, natijasi yuzasidan belgilangan tartibda tegishli taʼsir chorasi qoʻllanildi.