Qoʻshrabot tumani hokimiga hayfsan berildi
Tarmoqda u ayrim xodimlarni haqorat qilgani audiosi tarqalgan.
Qoʻshrabot tumani hokimi Dilshod Shakarboyevga jazo berildi. Bu haqda Samarqand viloyati hokimligi xabar berdi.
Internet tarmogʻida Qoʻshrabot tumani hokimi Dilshod Shakarboyevning ayrim xodimlarni haqorat qilganligi yuzasidan audio yozuv eʼlon qilindi.
Mazkur holatga viloyat hokimligining tegishli masʼullari tomonidan aniqlik kiritilgan.
"Samarqand viloyati hokimining tegishli farmoyishi bilan Qoʻshrabot tumani hokimi Shakarboyev Dilshod Davronovichga nisbatan hayfsan intizomiy jazo chorasi qoʻllanildi" deyiladi viloyat hokimligi xabarida.
Dilshod Shakarboyev Qoʻshrabot tumaniga 2022 yil yozida rahbar etib tayinlangan. U avval Samarqand viloyati Iqtisodiy taraqqiyot va kambagʻallikni qisqartirish bosh boshqarmasi boshligʻining birinchi oʻrinbosari lavozimida ham faoliyat olib borgan.
