Mobil telefonlar va miya saratoni oʻrtasida bogʻliqlik yoʻqligi eʼlon qilindi
2003 yildan beri uyali telefondan foydalanish keskin oshgan boʻlsada, bu davrda miya saratoni koʻpaymagan.
Jahon sogʻliqni saqlash tashkiloti buyurtmasi boʻyicha avstraliyalik olimlar tomonidan oʻtkazilgan tadqiqot natijalari eʼlon qilindi.
Tadqiqotda 1994 yildan 2022 yilgacha dunyoning oʻnta davlatidan toʻplangan mobil telefondan foydalanish va miya saratoni xavfi oʻrtasida bogʻliqlik bor-yoʻqligi haqidagi maʼlumotlar tahlil qilindi.
Mobil aloqaning dastlabki kunlarida koʻplab mutaxassislar uyali telefonlarni boshga yaqin joyda tez-tez ishlatish miya saratoniga olib kelishi mumkinligidan qoʻrqishgan. Shu sababli, mobil telefon ishlab chiqaruvchilari har bir aniq telefon modelining radio emissiya darajasini oʻlchab, nashr etdilar va bu haqda isteʼmolchilarga maxsus bukletlarda xabar berishdi.
Biroq, Avstraliya Radiatsiyadan himoya qilish va Yadro xavfsizligi boshqarmasi tomonidan taqdim etilgan natijalar mobil telefondan foydalanish va miya saratoni oʻrtasida hech qanday bogʻliqlik yoʻqligini tasdiqlaydi.
Natijalarga asoslanib tadqiqotchilarning taʼkidlashicha, miya saratoni bilan kasallanishning umumiy darajasi tadqiqot va maʼlumotlar toʻplash davomida barqaror boʻlib, vaqt oʻtishi bilan hech qanday tebranishlarni koʻrsatmadi, chunki isteʼmolchilar mobil telefonlardan tobora koʻproq foydalanmoqda. 1993 yildan 2022 yilgacha qayd etilgan miya shishi holatlarining koʻpayishi diagnostika usullarining rivojlanishi, shuningdek, MRT tadqiqotlarining keng tarqalishi bilan bogʻliq.
Tadqiqot natijalari shuni koʻrsatadiki, "uyali telefondan foydalanish 2003 yildan beri keskin oshgan boʻlsada, bu davrda miya saratoni koʻpaymagan". Shuningdek, 2003 yildan beri telefonda koʻp suhbat oʻtkazish talab qiladigan kasb egalari orasida kasalliklar sonining koʻpayishi kuzatilmadi.