Rossiyada yetti oʻzbekistonlik YTHda halok boʻldi
Prezident topshirigʻiga koʻra halok boʻlganlar jasadi Oʻzbekistonga qaytariladi.
Rossiyada yetti nafar oʻzbekistonlik halok boʻldi.
1 sentabr kuni "Vostok" federal avtomagistralida Nijniy Novgorod viloyati Navashinskiy tumanida sodir boʻlgan YTH oqibatida halok boʻlgan 8 kishining 7 nafari Oʻzbekiston fuqarosi ekani aniqlangan.
Shuningdek, 3 nafar kishi turli tan jarohatlari bilan Nijegorod viloyatining tibbiyot muassasalariga joylashtirilgan.
Oʻzbekiston Respublikasi Prezidentining topshirigʻiga muvofiq, mamlakat Hukumati tomonidan halok boʻlganlar jasadlarini tez orada Vatanga qaytarish bilan bogʻliq barcha tashkiliy masalalarni tezkorlik bilan hal etish choralari koʻrilmoqda.
Ushbu masala Oʻzbekiston Respublikasi Vazirlar Mahkamasi va Oʻzbekiston Respublikasining Moskvadagi Elchixonasi tomonidan alohida nazoratga olingan, deyiladi xabarda.
Oʻzbekistonning Qozondagi Bosh konsulxonasi rahbariyati va Tashqi mehnat migratsiyasi agentligi vakolatxonasi xodimlari voqea joyida zarur yordam koʻrsatmoqda.