Oʻzbekiston Paralimpiya oʻyinlarida yana uchta medalni qoʻlga kiritdi
Asad Toshtemirov va Yorqinbek Odilov oltin medalga sazovor boʻldi, Guljanoy Naimova jarohat sabab kumush bilan cheklandi.
Oʻzbekiston terma jamoasi Paralimpiya oʻyinlarida yana ikkita oltin va bitta kumush medalni qoʻlga kiritdi. Asad Toshtemirov Paralimpiya oʻyinlari chempioni boʻldi.
Para taekvondo boʻyicha erkaklar oʻrtasida -80 kg vazn toifasida yurtimiz sharafini himoya qilayotgan Asad Toshtemirov ishtirokidagi final janggi yakunlandi. U hal qiluvchi bahsda meksikalik Luis Mario Najeraga qarshi dayanga chiqdi va 38:17 hisobida magʻlub etdi va oltin medalni qoʻlga kiritdi.
Para taekvondo boʻyicha ayollar oʻrtasida +65 kg vazn toifasida final jangi oʻtkazildi. Unda Guljanoy Naimova jarohat olib jangni davom ettira olmadi va britaniyalik Emi Trusdeylga 8:2 hisobida magʻlub boʻldi. Lekin Naimova kumush medalni qoʻlga kiritdi.
Para yengil atletika boʻyicha erkaklar oʻrtasida F57 klassida nayza uloqtirish bahslari yakunladi. Biz uchun ahamiyatlisi, unda ishtirok etgan Yorqinbek Odilov 50.32 metr natija qayd etib, delegatsiyaga beshinchi oltin medalni taqdim etdi.
