Prezident 522 nafar mahkumni afv etdi
Afv etilgan shaxslarning 159 nafari asosiy jazodan ozod etildi, 303 nafari jazoni oʻtashdan muddatidan ilgari shartli ozod qilindi.
Prezident Shavkat Mirziyoyev Mustaqillik bayrami munosabati bilan ozodlikdan mahrum etish jazosini oʻtayotgan, qilmishiga pushaymon boʻlgan va tuzalish yoʻliga oʻtgan 522 nafar mahkumni afv etdi.
Afv etilgan shaxslarning 159 nafari asosiy jazodan ozod etildi, 303 nafari jazoni oʻtashdan muddatidan ilgari shartli ozod qilindi, 60 nafarining ozodlikdan mahrum etish jazosi yengilroq jazo bilan almashtirildi.
Afv etilganlarning 19 nafarini chet el fuqarolari, 56 nafarini ayol, 25 nafarini 60 yoshdan oshgan erkak, 233 nafarini yoshlar (shulardan, 1 nafari voyaga yetmagan) hamda 27 nafarini taqiqlangan tashkilotlar faoliyatida qatnashgan shaxslar tashkil etadi.
Farmon ijrosi yuzasidan afv etilgan shaxslarni oilasi va yaqinlari bagʻriga qaytarish, ijtimoiy hayotga moslashib, foydali mehnat bilan shugʻullanishlari, sogʻlom turmush tarzini yoʻlga qoʻyib, jamiyatda munosib oʻrin topishlari uchun ularga koʻmak berish boʻyicha masʼul vazirlik va idoralarga tegishli topshiriqlar berildi.