Fargʻonada aholining 4 mlrd soʻmdan oshiq qarzi bekor qilindi
Taʼminotchi tashkilot xonadonlarga yetarli darajada issiqlik yetkazib berilmagan vaqt uchun ham toʻlov talab qilgan.
Raqobat qoʻmitasi Fargʻona viloyatida aholiga yozilgan 4 mlrd soʻmdan oshiq qarzni bekor qildi.
Qoʻmitaning Fargʻona viloyati hududiy boshqarmasiga tushgan murojaatlar asosida Fargʻona viloyati “Issiqlik manbai” ishlab chiqarish davlat boshqarmasi bilan hamkorlikda maishiy isteʼmolchilarga yetkazib berilgan issiqlik energiyasi hamda koʻrsatilgan xizmatlar boʻyicha oʻrganish ishlari olib borilgan.
Oʻrganishlarda isitish mavsumi davomida koʻp qavatli uylarga issiqlik taʼminotini yetkazib beruvchi markaziy tarmoqlarning isitish qozonxonalarida avariya holatlari (taʼminot uzilishi) sodir boʻlgan vaqtlarda hamda tabiiy gaz bosimi pastligi va boshqa asosli sabablarga koʻra, aholi xonadonlariga yetarli darajada issiqlik taʼminoti yetkazib berilmaganligi, shuningdek, taʼminotchi korxona bilan tuzilgan shartnomalarning tegishli bandlariga asosan qayta hisob-kitoblar amalga oshirilganda 6146 nafar isteʼmolchining xonadonlariga 4 mlrd 173 mln soʻmdan ortiq noreal debitor qarzdorliklar hisoblanganligi aniqlandi.
“Isteʼmolchilar huquqlarini himoya qilish toʻgʻrisida”gi Qonunga koʻra, sotuvchi (ijrochi) isteʼmolchini haq evaziga qoʻshimcha tovarlar sotib olishga yoki qoʻshimcha xizmatlardan foydalanishga qistashga, shuningdek koʻrsatilmagan xizmatlar uchun haq olishga haqli emas.
Yuqoridagilarga koʻra, ishni koʻrib chiqish yakuni boʻyicha hududiy boshqarma tomonidan mazkur holat yuzasidan viloyat “Icsiqlik manbai” ishlab chiqarish davlat boshqarmasiga isteʼmolchilarga hisoblangan 4 mlrd 173 mln soʻmdan ortiq asossiz qarzdorlikni bekor qilish yuzasidan koʻrsatma berildi.
Amalga oshirilgan ishlar natijasida taʼminotchi korxona tomonidan koʻrsatilmagan xizmatlar uchun hisoblangan qarzdorliklar bekor qilindi.
Avvalroq qoʻmita dorilarning qimmat narxda sotilishi boʻyicha ham chora koʻrgandi.