Yevropada bir mavsumda qariyb 50 ming kishi jazirama sabab halok boʻldi
Eng koʻp oʻlim holatlari Janubiy Yevropa, jumladan Gretsiya, Bolgariya, Italiya, Ispaniya, Kipr va Portugaliyada kuzatilgan.
Barselona Global Salomatlik Instituti (IS Global) 2023 yilda jazirama tufayli Yevropaning 35 davlatida 47,7 ming kishi halok boʻlgan tadqiqotini eʼlon qildi.
Maʼlumotlar 2023 yil iyundan oktabrgacha boʻlgan davrni qamrab oladi. Jazirama Gretsiya, Bolgariya va Italiyada oʻlimlarga eng katta taʼsir koʻrsatdi.
IS Global tadqiqotiga koʻra, issiqlik bilan bogʻliq oʻlim darajasi 2023 yilda 2022 yilga nisbatan past boʻlgan.
Tadqiqotchilar buni 2022 yilning yozida boʻlgani kabi 2023 yilda ham katta harorat anomaliyalari qayd etilmagani bilan bogʻlashmoqda. 2023 yilda oʻlim holatlarining 57% (27 000) ga yaqini iyul oʻrtalari va avgust oyining oxiriga toʻgʻri kelgan, oʻshanda Yevropa mamlakatlari eng kuchli issiqlik toʻlqinlarini boshdan kechirgan.
Tadqiqot uchun olimlar butun 2023 yil uchun Yevropaning 35 mamlakatidagi 823 mintaqada harorat va oʻlim koʻrsatkichlaridan foydalanganlar. Epidemiologik modellarni yaratish uchun tadqiqotchilar shunga oʻxshash maʼlumotlardan foydalanganlar.
Eng koʻp jabrlanganlar janubiy Yevropa aholisi, yaʼni Gretsiya (million kishi boshiga 393 oʻlim), Bolgariya (229), Italiya (209), Ispaniya (175), Kipr (167) va Portugaliya (136) edi. Aholining eng zaif guruhlari orasida tadqiqotchilar ayollar va 80 yoshdan oshgan keksa odamlarni aniqladilar. Issiqlik bilan bogʻliq oʻlim ayollarda erkaklarnikiga qaraganda 55% ga yuqoriroqdir.
Avvalroq Tokioda bir oyda 120 kishi issiqdan halok boʻlgani aytilgandi.