Oʻzbekiston elektr energiyasini Yevropaga eksport qilmoqchi

Kaspiy dengizi tubi boʻylab kabel yotqizish boʻyicha Qozogʻiston-Oʻzbekiston-Ozarbayjon qoʻshma uch tomonlama loyihasi muvaffaqiyatli amalga oshirilsa, Oʻzbekiston 2030 yildan boshlab ortiqcha elektr energiyasini Yevropaga eksport qila oladi.

Bu haqda Oʻzbekiston Energetika vaziri Joʻrabek Mirzamahmudov Ostonada boʻlib oʻtayotgan Markaziy Osiyo energetika vazirlarining birinchi yigʻilishida maʼlum qildi.

"Joriy yil oxiriga qadar biz qayta tiklanadigan energiya manbalaridan olinadigan umumiy energiya quvvatini 2030 yilga kelib 20 GVt dan ortiqroq darajaga yetkazamiz, shundan ikki GVtdan besh GVtgacha Yevropaga eksport qilinishi mumkin boʻladi", - degan Mirzamahmudov.

Uning soʻzlariga koʻra, eksportning aniq hajmi elektr energiyasini uzatish tizimining quvvati va yevropalik xaridorlarning ehtiyojlariga bogʻliq boʻladi.

Vazirning tushuntirishicha, Oʻzbekistondan elektr energiyasi Qozogʻiston orqali Markaziy Osiyoning umumiy energetika tizimi orqali, keyin Kaspiy dengizi tubi boʻylab Ozarbayjonga, u yerdan Gruziyaga, soʻngra Qora dengiz tubi boʻylab kabel orqali Ruminiya, Vengriya va Bolgariyaga oʻtkaziladi. 

Oʻzbekistonni rivojlantirish strategiyasiga muvofiq, 2030 yilga kelib umumiy ishlab chiqarish quvvati 2,4 barobarga – 44,9 GVtgacha oshiriladi. Shu bilan birga, qayta tiklanadigan energiya manbalarining ulushi 40 foizga yetkaziladi va bu maqsadda umumiy quvvati 18,8 GVt (8,6 GVt – quyosh, 10,2 GVt – shamol) boʻlgan quyosh va shamol energiyasi ishlab chiqarish loyihalari amalga oshiriladi.

1 may kuni Toshkent investitsiya forumi doirasida Oʻzbekiston, Qozogʻiston va Ozarbayjon Yevropaga yashil elektr energiyasi yetkazib berish boʻyicha energiya tizimlarini integratsiyalash boʻyicha hamkorlik memorandumini imzolagan edi.