Eron oliy rahbari Isroilga "qattiq jazo" bilan tahdid qildi
Bu Tehronda oʻldirilgan HAMAS rahbari Ismoil Xaniya voqeasi bilan bogʻliq. Eron oliy rahbari "buning uchun qasos olinishini" aytgan.
Eron HAMAS siyosiy byurosi rahbari Ismoil Xoniyaning oʻlimi uchun Isroilga "qattiq jazo" bilan tahdid qildi.
Eron oliy rahnamosi Oyatulloh Ali Xomanaiy Isroil XAMAS siyosiy byurosi rahbarining oʻldirilishi uchun qattiq jazolanishi kerakligini aytdi, deb yozadi RBK.
"Biz ogʻir jazo uchun zamin yaratishni va Islom Respublikasi hududida shahid boʻlgan odamning qoni uchun qasos olishni oʻz burchimiz deb bilamiz", — dedi Oyatulloh Ali Xomanaiy Isroil va HAMAS siyosiy rahbarining oʻlimiga ishora qilib.
Eronning yaqinda saylangan prezidenti Masud Pezeshkiyon ham Tehron Xoniyani oʻldirgan "terrorchi bosqinchilarni qilmishidan pushaymon qilishini" aytgan. Shu bilan birga, Eron vitse-prezidenti Amir Husayn Gʻozizoda Hoshimiyning taʼkidlashicha, Falastin qarshilik harakati HAMAS yetakchisining oʻldirilishining "aybdorlarini jazolashga" toʻliq haqli.
Eslatib oʻtamiz, HAMAS harakati Siyosiy byurosi rahbari Ismoil Haniya va uning qoʻriqchisi Tehronda raketa tushishi oqibatida halok boʻldi. HAMASning bildirishicha, Siyosiy byuro rahbari Eronning yangi prezidenti Masud Pezeshkyanning bir kun avval, 30 iyul kuni boʻlib oʻtgan inauguratsiya marosimida ishtirok etgan.
Isroil mudofaa kuchlari Haniyaning oʻlimiga izoh berishdan bosh tortdi. Shu bilan birga, Isroilning Quddus va meros ishlari boʻyicha vaziri Amikay Eliyaxu uning oʻlimini «dunyoni axloqsizlikdan tozalashning toʻgʻri yoʻli» deb atadi. The Times of Israel taʼkidlaganidek, Eliyaxu Hamas yetakchisining oʻldirilishi ortida Isroil turganiga ishora qilgan birinchi isroillik yuqori martabali amaldor boʻldi.
CNN taʼkidlaganidek, Haniya XAMASning xalqaro aloqalari uchun masʼul boʻlgan va oʻt ochishni toʻxtatish va garovga olinganlarni ozod qilish boʻyicha muzokaralarning asosiy ishtirokchilaridan biri boʻlgan. Uning oʻldirilishi allaqachon Falastin milliy maʼmuriyati rahbari Mahmud Abbos hamda Turkiya, Eron va Rossiya tashqi ishlar vazirliklari tomonidan qoralangan.
"Biz yana bir bor barcha manfaatdor tomonlarni vazminlik koʻrsatishga va mintaqadagi xavfsizlik bilan bogʻliq vaziyatning keskin yomonlashuviga olib kelishi va keng koʻlamli qurolli qarama-qarshilikni keltirib chiqarishi mumkin boʻlgan qadamlardan saqlanishga chaqiramiz", — deyiladi Rossiya TIV bayonotida.