YHXBBning 26,5 mlrd. soʻmlik savdolarida qonunbuzilishi aniqlandi
Tender yoʻl belgilari uchun boʻyoqlar va shisha mahsulotlarni xarid qilish uchun oʻtkazilgan.
Yoʻl harakati xavfsizligi bosh boshqarmasining tender savdolarida qonunbuzilishi aniqlandi. Bu haqda Raqobat qoʻmitasi maʼlumot berdi.
Qoʻmitaga Ichki ishlar vazirligi yoʻl harakati xavfsizligi bosh boshqarmasi tomonidan 2024 yil 10 iyunda boshlangʻich qiymati 26 mlrd 500 mln soʻmga yaqin oʻtkazilgan tender savdolari yuzasidan murojaat kelib tushgan.
Qoʻmita tomonidan murojaatga asosan olib borilgan oʻrganishlarda tender savdolari yoʻl belgilari uchun boʻyoqlar va shisha mahsulotlarni xarid qilish uchun oʻtkazilgani maʼlum boʻldi.
Ishni koʻrib chiqish natijasida, Raqobat toʻgʻrisida”gi Qonunining 29-moddasi talablari buzilgan deb topilib, Oʻzbekiston Respublikasi Ichki ishlar vazirligi yoʻl harakati xavfsizligi bosh boshqarmasiga nisbatan tender savdo natijasini haqiqiy emas deb topish boʻyicha koʻrsatma berildi.
Shuningdek, ushbu qonunbuzilish holatiga yoʻl qoʻygan mansabdor shaxsga nisbatan belgilangan tartibda maʼmuriy javobgarlikni belgilash masalasi koʻrib chiqiladi.
Maxsus komissiyaning ushbu qaroridan norozi boʻlgan tomon Qoʻmitaning Apellyatsiya kengashiga yoki sudga murojaat qilish huquqiga ega.