Nukusda direktor oʻrinbosari qoʻlga olindi
Universitet filiali mansabdori 2 ming AQSh dollari olayotganda ushlandi.
Nukusda universitet filiali direktori oʻrinbosari pora bilan ushlandi.
Bosh prokuratura huzuridagi Departamentning Qoraqalpogʻiston Respublikasi boshqarmasi, DXX va IIV xodimlari hamkorligida tezkor tadbir oʻtkazilgan.
Unda fuqaro T.Ye. fuqaro S.S.ning ishonchiga kirib, uni tanishlari yordamida Oʻzbekiston davlat jismoniy tarbiya va sport universitetining Nukus filialiga oʻqishga kiritib qoʻyishi evaziga 2 000 AQSh dollarini olgan vaqtida ushlangan. Uning koʻrsatuviga asosan davom etgan tadbirda ushbu universitetning Nukus filiali direktori oʻrinbosari R.X. fuqaro S.S.ni oʻqishga kiritib qoʻyish uchun 2 000 AQSh dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.