Toshkent aeroporti uchib ketish zali yonida yongʻin sodir boʻldi
Uchib ketish zali yonida oshxona yongan. Aeroport odatiy tartibda ishlamoqda.
Toshkent aeroporti uchib ketish zali yonida kafe yonib ketdi. Bu haqda Uzbekistan Airports xabar berdi.
Mahalliy vaqt bilan soat 11:20 da Toshkent xalqaro aeroporti uchib ketish terminali oldi hududidagi "Terminal" kafesida yongʻin sodir boʻldi.
Voqea joyiga aeroport va shahar oʻt oʻchirish boʻlimlari yetib kelgan. Yongʻin soat 11:47 da oʻchirilgan.
Yongʻin natijasida 5 kv.m maydonga zarar yetkazilgan. Jabrlanganlar yoʻq.
Dastlabki maʼlumotlarga koʻra, hodisaga oshxonadagi kichik yongʻin sabab boʻlgan.
Toshkent xalqaro aeroporti normal rejimda ishlamoqda, deyiladi xabarda.