Boliviyada hokimiyatni agʻdarishga urinish sodir boʻldi
Hujumni armiya generali Xuan Xose Zuniga boshlagan. U "haqiqiy demokratiya qurish" chaqirigʻi bilan chiqqan.
Boliviyada harbiylar tomonidan davlat toʻntarishiga urinish kuzatildi.
Boliviyada harbiylar prezident saroyiga bostirib kirishga urindi. Prezident buni davlat toʻntarishiga urinish deb atadi
Boliviya prezidenti Luis Arse harbiylar prezident qarorgohi joylashgan La-Pasdagi Buyuk Xalqlar uyiga bostirib kirishga uringach, mamlakat xalqini davlat toʻntarishiga urinishga qarshi chiqishga chaqirdi.
"Boliviya xalqi demokratiya uchun davlat toʻntarishiga qarshi birlashishi va safarbar boʻlishi zarur. Biz toʻntarish urinishlarining yana Boliviya hayotiga zomin boʻlishiga yoʻl qoʻya olmaymiz", dedi u murojaatida.
26 iyun kuni qoʻshinlar hukumat binolari joylashgan La-Pasdagi Plaza Murilloga kirish yoʻllarini toʻsib qoʻyishdi, shundan soʻng tanklar bilan kirishga urinishdi. Zirhli texnika va qoʻshinlar maydonda oʻz oʻrnini egalladi.
Hujumni boshqargan Boliviya armiyasi generali Xuan Xose Zuniga harbiylarning maqsadi mamlakatda demokratiyani tiklash ekanligini aytdi va siyosiy mahbuslarni qamoqdan ozod qilishga vaʼda berdi.
"Qurolli kuchlar demokratiyani qayta qurish, uni 30-40 yil davomida bir xil bir necha kishi boshqarib kelayotgan emas, haqiqiy demokratiyaga aylantirish tarafdori", dedi u prezident saroyi oldida.
Keyinroq prezident yangi harbiy rahbariyatni tayinlaganini va armiya boshligʻi Xose Uilson Sanchesni qasamyod qilganini aytdi. Shundan soʻng, axborot agentligi muxbirlariga koʻra, harbiylar maydonni tark eta boshlagan.
Boliviya harbiylari yangi armiya boshligʻining buyrugʻiga binoan prezident saroyidan chekingan.
Ularga rahbarlik qilgan general hibsga olindi va rasmiylar tergov boshladi.