Xalqaro sud Shoygu va Gerasimovni hibsga olish uchun order berdi
Ular Ukraina hududlariga ommaviy hujumlar uyushtirish va tinch aholiga qarshi jinoyatlarda ayblanmoqda.
Gaagadagi Xalqaro jinoiy sud Rossiya sobiq mudofaa vaziri Sergey Shoygu va Bosh shtab rahbari Valeriy Gerasimovni Ukrainaning energetika infratuzilmasiga qilingan hujumlar va tinch aholiga zarar yetkazganlikda ayblab, hibsga olishga order berdi.
Ilgari ushbu sud prezident Vladimir Putin va bolalar ombudsmani Mariya Lvova-Belova, shuningdek, Rossiyaning ikki harbiy rahbarini hibsga olishga order bergan edi.
Sud press-relizidan maʼlum boʻlishicha, Shoygu va Gerasimovga qoʻyilgan ayblovlar 2022 yil 10 oktabrdan kamida 2023 yil 9 martgacha sodir boʻlgan voqealarga tegishli.
Sudgacha boʻlgan palataning maʼlumotlariga koʻra, sobiq mudofaa vaziri va Rossiya Qurolli Kuchlari Bosh shtabi boshligʻi fuqarolik obʼektlarini nishonga olish, yoki fuqarolik obʼektlariga zarar yetkazish uchun javobgardir.
Bundan tashqari, ular "gʻayriinsoniy harakatlar shaklida" insoniyatga qarshi jinoyatda gumon qilinmoqda.
"Rossiya harbiy kuchlari tomonidan kamida 2022 yil 10 oktabrdan kamida 2023 yil 9 martgacha boʻlgan davrda Ukraina elektr energetika infratuzilmasiga uyushtirilgan raketa hujumlari uchun ikki gumonlanuvchi javobgar deb hisoblash uchun asosli asoslar mavjud", — deyiladi matbuot bayonotida. Bu vaqt ichida Ukrainadagi elektr stansiyalari va podstansiyalariga koʻplab hujumlar uyushtirildi.
Eslatib oʻtamiz, Vladimir Putin Sergey Shoyguni Mudofaa vazirligi rahbarligidan ozod etib, Xavfsizlik kengashi kotibi etib tayinlagan.
