Ozarbayjon Fransiyaga jiddiy ayblov qoʻydi
Armaniston va Fransiya harbiy hamkorlik boʻyicha yangi shartnomalar, Sezar artilleriya qurilmalarini yetkazib berish boʻyicha shartnoma imzolagan.
Ozarbayjon Mudofaa vazirligi Armaniston va Fransiyani Janubiy Kavkaz mintaqasida mojaroni kuchaytirayotganlikda aybladi.
Vazirlik bayonotida aytilishicha, vaziyatning keskinlashuvi uchun javobgarlik butunlay Armaniston rahbariyati va "Makron diktaturasi" zimmasiga tushadi.
Ozarbayjonning daʼvo qilishicha, ogohlantirishlarga qaramay, Fransiya Armanistonni halokatli artilleriya va boshqa qurollar bilan taʼminlashda davom etmoqda.
"Fransiyaning Armanistonni halokatli va hujumkor artilleriya qurilmalari va boshqa turdagi qurollar bilan taʼminlagani Fransiyaning Janubiy Kavkaz mintaqasidagi provokatsion faoliyatining yana bir dalilidir", — deya taʼkidlaydi Ozarbayjon Mudofaa vazirligi.
Vazirlik, shuningdek, Fransiya va Armaniston oʻrtasida Sezar oʻziyurar artilleriya tizimini sotib olish boʻyicha imzolangan shartnoma bu pozitsiyani tasdiqlaganini taʼkidladi. Rasmiy Boku Fransiyani Armaniston va Ozarbayjon oʻrtasidagi munosabatlarni normallashtirishga toʻsqinlik qilayotganlikda ayblab, Parij siyosatini "militarizatsiya va geosiyosiy intriga" deb atadi.
"Makron rejimi Janubiy Kavkaz mintaqasida harbiylashtirish va geosiyosiy intriga siyosatini olib borar ekan, Armaniston va Ozarbayjon oʻrtasidagi munosabatlarning normallashuviga toʻsqinlik qilmoqda va mintaqada notinchlikni taʼminlamoqda", — deyiladi bayonotda.
Eslatib oʻtamiz, avvalroq Armaniston va Fransiya harbiy hamkorlik boʻyicha yangi shartnomalar, jumladan Sezar artilleriya qurilmalarini yetkazib berish boʻyicha shartnoma imzolagani maʼlum boʻlgan edi. Fransiya Mudofaa vazirligi rahbari Sebastyan Lekornu mamlakatining Armaniston bilan mudofaa sohasidagi aloqalari mustahkamlanishiga ishontirdi.
Mazkur kelishuvning imzolanishi Armaniston mudofaa vaziri Suren Papikyanning Fransiyaga tashrifi chogʻida boʻlib oʻtdi, u Eurocatory 2024 koʻrgazmasiga tashrif buyurdi va fransuz hamkasbi bilan uchrashdi. Bundan tashqari, Armaniston Franko-Germaniya konserni KNDC bilan hamkorlik shartnomasi tuzdi, uning tafsilotlari oshkor qilinmayapti.