Oʻzbekiston internet tezligi boʻyicha bir pogʻona pastladi
Mamlakat mobil internet tezligi boʻyicha 89-oʻrinni egalladi. Rossiya esa 105-pogʻonada.
Oʻzbekiston mobil va simli internet tezligi boʻyicha reytingda bir pogʻonadan pastladi.
Speedtest Global Index oʻtgan may oyi boʻyicha koʻrsatkichlarni eʼlon qildi.
Mobil internet tezligi boʻyicha Oʻzbekiston 89-oʻrinni egallagan (-1). Mamlakat Iroq va Meksika oraligʻida joylashgan. Rossiya 105-oʻrinni band etdi.
Simli internet boʻyicha esa 90-oʻrinda (-1). Qoʻshni Qirgʻiziston Oʻzbekistondan bir pogʻona yuqoridan oʻrin egalladi.
Markaziy Osiyoda Qozogʻiston har ikkala koʻrsatkich boʻyicha eng yaxshi natijani qayd etgan.
Dunyo boʻyicha eng yaxshi mobil internet Qatarda, simli internet esa Singapurda ekani qayd etildi. Shuningdek, Gongkong, BAA,Kuvayt, Daniya kabi davlatlar ham yuqori oʻrinlardan joy oldi.
Aprel oyida Oʻzbekiston internet tezligi boʻyicha besh pogʻona koʻtarilgandi.
