Kuvaytdagi yongʻinda qariyb 50 ishchi halok boʻldi
Qurbonlarning 40 nafari hindistonliklardir. Halok boʻlganlar mehnat muhojirlari sanaladi.
Kuvayt janubi-sharqidagi Mangaf tumanida ishchilar yashaydigan binoda chiqqan yongʻin oqibatida kamida 49 kishi halok boʻldi. Oʻnlab odamlar yaralangan, deya xabar bermoqda Euronews.
Qurbonlar orasida 40 nafar Hindiston fuqarosi ham bor. Bu xabarni mamlakat tashqi ishlar vazirligi tasdiqlagan.
Kuvayt rasmiylari uy egasini hibsga olish niyatida ekanliklarini eʼlon qilib, "mulk egalarining ochkoʻzligi bunday muammolarga olib keladi", deya bayonot berishgan.
Kuvayt koʻplab sohalarda, jumladan, qurilish va neft qazib olishda chet ellik ishchilarga tayanadi.
Mahalliy matbuotning xabar berishicha, binoda 200 ga yaqin ishchi boʻlgan.