Qurbon hayitida oʻzbekistonliklar ketma-ket uch kun dam oladi
Prezidentning bayram boʻyicha qarori eʼlon qilindi.
Qurbon hayitida oʻzbekistonliklar ketma-ket uch kun dam oladi.
Prezident Shavkat Mirziyoyev “Muborak Qurbon hayitini nishonlash toʻgʻrisida”gi qarorni imzoladi.
Qarorga koʻra, 2024 yilda Qurbon hayitining birinchi kuni 16 iyun – yakshanbaga toʻgʻri kelishi munosabati bilan yurtimizda 16 iyun Qurbon hayiti bayrami sifatida nishonlanadi.
Qurbon hayitining birinchi kuni dam olish kuniga toʻgʻri kelishi munosabati bilan ushbu dam olish kuni 17 iyun – dushanba kuniga koʻchiriladi, 18 iyun – seshanba kuni barcha xodimlar uchun qoʻshimcha dam olish kuni boʻladi.
Mahalliy davlat hokimiyati organlari, masʼul vazirlik va idoralarga muborak Qurbon hayitini xalqimizning milliy anʼana va urf-odatlariga uygʻun holda oʻtkazish uchun tegishli chora-tadbirlarni amalga oshirish, yurtdoshlarimiz uchun muborak Qurbon hayiti kunlarida moʻʼtabar ziyoratgohlar va tarixiy qadamjolarga ziyoratlarni tashkil etish maqsadida qulay sharoit va imkoniyatlar yaratish topshirildi, deyiladi xabarda.