Daniya bosh vaziriga nomaʼlum shaxs hujum qildi
Bosh vazir jiddiy jarohat olmagan, ammo shokda ekani aytilmoqda.
Daniya bosh vaziri Mette Frederiksen Kopengagen markazida hujumga uchradi.
Ritzau agentligining Reuters'ga tayanib xabar berishicha, bir kishi Daniya hukumati rahbariga yaqinlashib, uni ura boshlagan. Hujumchi qoʻlga olingan, ammo uning sabablari haqida hozircha maʼlumot berilmagan.
Bosh vazirlik idorasining bildirishicha, bosh vazir jiddiy jarohat olmagan, ammo shokda. Hujum Kopengagenning markaziy maydonlaridan birida sodir boʻldi. Eslatib oʻtamiz, Daniyada siyosatchilarga hujumlar juda kam uchraydi.
Soʻnggi vaqtlarda Yevropada siyosatchilarga tajovuzlar koʻpaymoqda. May oyida Slovakiya bosh vaziri Fitso otib ketilgandi.