Rossiyada ikki tramvay toʻqnashdi, yuzga yaqin kishi jabrlangan
Bundan tashqari bir yoʻlovchi vafot etgan. Aytilishicha, tramvaylardan birining tormozi ishlamay qolgan.
Rossiyaning Kemerovo shahrida tramvay toʻqnashuvi oqibatida 90 kishi jabrlandi, ulardan uch nafarining ahvoli ogʻir, dedi hudud gubernatori. Shuningdek, bir kishi vafot etgan, jabrlanganlarning yetti nafari bolalardir.
Xavfsizlik talablariga javob bermaydigan xizmatlar koʻrsatish yuzasidan ish qoʻzgʻatilgan.
"Jabrlanganlardan uch nafarining ahvoli ogʻir – ikkitasi reanimatsiyada, biri operatsiya xonasida. Shifokorlar hayotlari uchun kurashmoqda. Oʻn kishi ambulator davolanishga joʻnatildi", — deb yozdi Kemerovo viloyati gubernatori vazifasini bajaruvchi Ilya Seredyuk oʻz Telegram-kanalida.
Avvalroq shahar meri Dmitriy Anisimov jabrlanganlar soni 50 nafarni tashkil qilgani haqida xabar bergan edi. Voqea sodir boʻlgan hududda transport harakati toʻsib qoʻyilgan, bepul transport yoʻnalishlari tashkil etilgan. Qurbonlarning qarindoshlari uchun ishonch telefoni mavjud.
Hodisa mahalliy vaqt bilan soat 07:30 da Logovaya shossesida sodir boʻlgan. Mahalliy nashrlarning xabar berishicha, avariyaga texnik nosozlik sabab boʻlgan — tramvaylardan birining tormozi ishlamay qolgan.
Tergov qoʻmitasi xavfsizlik talablariga javob bermaydigan xizmatlar koʻrsatish (Jinoyat kodeksining 238-moddasi 2-qismi) boʻyicha ish qoʻzgʻatdi, bu olti yilgacha ozodlikdan mahrum qilish bilan jazolanadi. Mahalliy prokuratura ham tergov boshlagan.
