Qirgʻizistondan Oʻzbekistonga giyohvand moddalar oʻtkazuvchi tarmoq yoʻq qilindi
Oʻzbekistonga narkotik moddalarni oʻtkazish bilan shugʻullangan "Yovvoyi" laqabli shaxsni qoʻlga olingan.
Qirgʻizistondan Oʻzbekistonga narkotik oʻtkazuvchi tarmoq yoʻq qilindi.
Qirgʻiziston huquq-tartibot idoralari xodimlari Oʻzbekistonga giyohvand moddalarni olib oʻtish tarmogʻini yoʻq qilib, "Yovvoyi" laqabli shaxsni qoʻlga oldi. Bu haqda Vesti.kg xabar bermoqda.
Qirgʻiziston Ichki ishlar vazirligi maʼlumotlariga koʻra, huquq-tartibot idoralari xodimlari qishdan beri maxsus operatsiya oʻtkazmoqda. Qirgʻizistonning Aqsi va Olabuqa tumanlari orqali narkotik moddalar savdosini tashkil qilgan, muqaddam sudlangan Toʻqtoʻgʻul tumanida tugʻilgan, "Yovvoyi" laqabli fuqaro qoʻlga olindi. U uyushgan jinoiy giyohvandlik guruhi aʼzosi sifatida Ichki ishlar vazirligining tezkor reyestrida turgan.
Operatsiya davomida 16 kilogrammdan ortiq gashish ham musodara qilindi.
Mazkur holat yuzasidan Qirgʻiziston Respublikasi Jinoyat kodeksining 282-moddasi bilan jinoyat ishi qoʻzgʻatilgan. Qoʻlga olingan shaxs vaqtinchalik saqlash izolyatoriga joylashtirildi.
Tergov tadbirlari davom etmoqda. Eslatib oʻtamiz, avval Qirgʻiziston va Oʻzbekiston chegarasida ikki maxfiy tunnel va katta miqdorda tilla buyumlar aniqlangandi.
