Banklarda xarajat oshib, daromad kamaymoqda
Foizli xarajatlar 45 foizga oshgan, yaʼni banklar qimmat foizlarda resurs jalb qilib, arzon foizlarda kreditlar ajratishga majbur boʻlmoqda.
Oʻzbekistondagi banklarining xarajatlari keskin ortib, daromadlarning oʻsish surʼati pasaymoqda. Markaziy bank eʼlon qilgan “Bank tizimi daromadlilik koʻrsatkichlari” hisobotidan shunday xulosa anglashiladi.
Xususan, joriy yilning yanvar-aprel oylarida banklarning foizli daromadlari oʻtgan yilning shu davriga nisbatan 35,5 foizga oshgan (mos ravishda 25,528 va 34,558 trln. soʻm).
Foizli xarajatlari esa 45 foizga koʻpaygan (mos ravishda 16,606 va 24, 074 trln. soʻm). Yaʼni, banklar qimmat foizlarda resurs va depozitlar jalb qilib, arzon foizlarda kreditlar ajratishga majbur boʻlmoqda.
Oʻtgan davr mobaynida foizsiz daromadlar bor-yoʻgʻi 12,6 foizga oshgan (mos ravishda 14,684 va 16, 533 trln. soʻm), foizsiz xarajatlar esa 68,6 foizga koʻpaygan (mos ravishda 3,088 va 5,205 trln. soʻm).
Shu bilan birga, banklarning foyda soligʻi xarajatlari 929 mlrd. soʻmga qisqargan. (Oʻtgan yilda 1,016 mlrd.) Jamlangan sof foyda oʻtgan yilga (4,031 trln.) nisbatan deyarli 1 trln. soʻmga, yaʼni 3,025 trln. soʻmgacha kamaygan.