Shavkat Mirziyoyev Ibrohim Raisiyning oʻlimi sabab hamdardlik bildirdi
Oʻzbekiston prezidenti Eron shimolidagi hodisa sabab mamlakat Oliy diniy rahbari oyatulloh Ali Xomaneiyga hamdardlik yoʻlladi.
Oʻzbekiston prezidenti Shavkat Mirziyoyev Ibrohim Raisiyning oʻlimi sabab hamdardlik bildirdi.
Oʻzbekiston Respublikasi Prezidenti Shavkat Mirziyoyev Eron shimolida yuz bergan fojia oqibatida Eron Islom Respublikasi Prezidenti Ibrohim Raisiy va unga hamrohlik qilgan shaxslarning vafot etgani munosabati bilan ushbu mamlakat Oliy diniy rahbari oyatulloh Ali Xomaneiyga hamdardlik bildirdi, deyiladi rasmiy xabarda.
Maktubda, jumladan, "Oʻzbekiston va Eron oʻrtasidagi keng qamrovli hamkorlikni, oʻzaro manfaatli va uzoq muddatli sheriklik munosabatlarini rivojlantirishga ulkan hissa qoʻshgan Ibrohim Raisiyning yorqin xotirasi xalqlar qalblarida doimiy saqlanib qolishi" taʼkidlanadi.
Shavkat Mirziyoyev doʻst Eron xalqiga, marhumlarning oila aʼzolari va yaqinlariga chuqur taʼziya izhor etdi.
Eslatib oʻtamiz, Eron prezidenti boʻlgan vertolyot 19 may kuni halokatga uchradi. Oqibatida prezident Raisiy va bir qator yuqori martabali amaldorlar halok boʻldi.