Buxorodagi ayrim hududlarda tezlik 70 km/soatga pasaytirilishi mumkin
Viloyatdan oʻtgan ayrim yoʻl uchastkalarida tezlikni pasaytirish boʻyicha loyiha muhokamaga qoʻyildi.
Regulation.gov.uz normativ-huquqiy hujjatlar loyihalari muhokamasi portalida yana bir hujjat - “Viloyat hududidagi shahar va tumanlar markaziy koʻchalari va avtomobil yoʻllarida harakat xavfsizligini taʼminlash, yoʻl-transport hodisalarini oldini olish chora-tadbirlarini kuchaytirish toʻgʻrisida”gi hokim qarori muhokamaga qoʻyildi.
Buxoro viloyati hokimligi kiritgan qaror loyihasida viloyat hududidan oʻtgan ayrim yoʻl uchastkalarida tezlikni 100 km/soatdan 70 km/soatga oʻzgartirish va va 3.24 “70 yuqori tezlik cheklangan” yoʻl belgilari oʻrnatish koʻzda tutilgan.
Bunday oʻzgarish kiritilishiga avtomobil yoʻllarining ayrim uchastkalarida transport harakat jadalligi va yuqori va tezlik oqibatida yoʻl-transport hodisalari koʻplab kuzatilishi sabab qilib koʻrsatilgan.
Qaror loyihasi yuzasidan muhokamalar 31 maygacha davom etadi.
Eslatib oʻtamiz, Oʻzbekiston Respublikasi Prezidentining 2023 yil 28 fevraldagi farmoniga koʻra, 1 apreldan boshlab Toshkent va Nukus shaharlarida hamda viloyatlar va tumanlarning markazlarida transport vositalari harakatlanishining eng yuqori tezligi soatiga 70 kilometrdan 60 kilometrgacha tushirilishi belgilangan.