Rossiyada qonunni buzganlar Qozogʻistonga bormasligi tavsiya etildi
Bu Qozogʻiston chegara va ichki ishlar tizimida yangi tizim joriy etilgani bilan izohlanmoqda.
Tashqi mehnat migratsiyasi agentligi ayrim fuqarolarga ogohlantirish bilan chiqdi. Aytilishicha, Rossiyada huquqbuzarlik sodir etgan shaxslarning Qozogʻistonga borishi tavsiya etilmaydi.
Qozogʻiston va Rossiya hukumatlarining maʼmuriy va jinoiy ishlari boʻyicha qarorlarni tan olish va ijro etishga oid ikki tomonlama kelishuvlari asosida Qozogʻiston chegara va ichki ishlar tizimida yangi tizim joriy etilgan.
Natijada soʻnggi vaqtlarda Rossiya hududida huquqbuzarlik sodir etgan Oʻzbekiston fuqarolarining Qozogʻiston chegarasini kesib oʻtish vaqtida hibsga olinish holatlari kuzatilmoqda.
Shuningdek, hibsga olingan shaxslar Rossiya tomoni mazkur huquqbuzarliklar boʻyicha yakuniy qaror qabul qilguniga qadar jazoni ijro etish muassasalarida saqlanmoqda.
Shu munosabat bilan, Rossiya hududida huquqbuzarlik sodir etib, Oʻzbekistonga kelgan yurtdoshlarga Qozogʻistonga bormaslik tavsiya qilinadi, deyiladi xabarda.