Oʻzbekiston fuqarolari Rossiyaga kiritilmayotgani boʻyicha xabarlar izohlandi
Tashqi mehnat migratsiya agentligi bu holatni inkor etib, Rossiya aeroportlaridagi ahvolni oʻrgandi.
Oʻzbekiston fuqarolari Rossiya hududiga qoʻyilmayotgani haqida xabarlar tarqaldi. Tashqi mehnat migratsiya agentligi mazkur xabarga izoh berdi.
Agentlikning Rossiyadagi vakolatxonasi tomonidan Oʻzbekistondan borayotgan muhojirlarning ushbu mamlakatga kirib chiqishi holatni oʻrganish maqsadida Moskva shahridagi "Vnukova", "Sheremetevo", "Domodedovo" aeroportlarining masʼul xodimlari bilan bogʻlanilib holatga aniqlik kiritilgan.
Aniqlanishicha, Moskva shahridagi mazkur aeroportlarda oʻzbekistonliklarning Rossiya hududiga qoʻyilmayotgani yoki uzoq vaqt davomida ushlab turish holatlari kuzatilmayotgani aniqlangan.
“Bundan tashqari, avtomashinalar orqali Rossiya Federatsiyasiga kirib kelinadigan Orenburg, Samara, Saratov viloyatlaridagi "Ozinki", "Mashtakovo", "Sagarchin" bojxona chegara postlaridagi holatlar ham oʻrganilganda, ushbu chegara postlari doimiy ish tartibida ishlayotganligi, Oʻzbekiston Respublikasi fuqarolari biron-bir toʻsiqlarsiz Rossiya Federatsiyasi hududiga kirayotganligi maʼlum boʻldi”, deyiladi Tashqi mehnat migratsiya agentligining bayonotida.
Eslatib oʻtamiz, avval Tojikiston TIV mamlakat fuqarolari Rossiyaga kirishda qiyinchiliklarga duch kelayotganini eʼlon qilib, zarurat boʻlmasa RFga bormaslikni soʻragandi. Qirgʻiziston TIV ham shunday bayonot bilan chiqqan.