Gruziyada ommaviy namoyishlar: sakkiz kishi jabrlandi
Tbilisida "xorijiy agentlar" boʻyicha qonunga qarshi namoyishlar davom etmoqda. Namoyishchilar bu qonunni Rossiyadan andoza olish deya baholadi.
1 may kuni Tbilisida xorijiy agentlar haqidagi qonunga qarshi oʻtkazilgan miting chogʻida kamida sakkiz kishi jarohatlandi.
Ularning barchasi shifoxonalarga yetkazilgan, deb xabar berdi Gruziya Sogʻliqni saqlash vazirligi. Ayni damda namoyishchilarning aksariyati parlament binosi oldidagi maydonni tark etishgan.
"1 may kuni Rustaveli prospektidagi norozilik namoyishi chogʻida 8 nafar tinch aholi yaralandi. Ular shifoxonaga yotqizilgan. Ulardan biri allaqachon uyiga joʻnatilgan, — deyiladi Rustavi2 telekompaniyasi bayonotida.
Sogʻliqni saqlash vazirligining aniqlik kiritishicha, qurbonlarning aksariyati yuz, bosh va tananing boshqa qismlaridan jarohat olgan. Namoyishchilarning baʼzilari mastlik va nafas olish tizimidagi asoratlardan aziyat chekdi. 2 mayga oʻtar kechasi Gruziya parlamentida xavfsizlikning qizil darajasi eʼlon qilindi va muassasa xodimlariga binoni tark etish buyurildi. Mahalliy vaqt bilan 03:30 atrofida namoyishchilar parlament binosining birinchi qavatidagi oynani temir quvur bilan sindirib, xonalardan biriga bir nechta tutunli bomba uloqtirishgan. Shundan soʻng Gruziya Ichki ishlar vazirligi xodimlari parlament binosi yaqinida namoyishchilarni ommaviy ravishda hibsga olishni boshladi. Ayni paytda, TASS muxbirining xabar berishicha, parlament binosi yonida atigi bir necha oʻnlab namoyishchilar qolmoqda. Politsiyaning aytishicha, tez orada shahar xizmatlari Rustaveli prospektida paydo boʻladi va yoʻlni tozalaydi. Miting yakunlanishidan avval maxsus kuchlar parlamentga xizmat koʻrsatish eshiklari darvozalariga barrikadalar oʻrnatayotgan namoyishchilarni ortga itarib yubordi. Gruziyada namoyishlar bir necha haftadan beri davom etmoqda.
1 may kuni "Xorijiy agentlar toʻgʻrisida" gi qonun ikkinchi oʻqishda qabul qilinganidan soʻng, parlament binosi oldida yana koʻplab namoyishchilar yigʻildi. Namoyishchilar bu qonun Yevropa Ittifoqiga kirishga urinayotgan Gruziyaga mos kelmasligini aytishgan. Shunga oʻxshash qonunlar Rossiya va Qirgʻizistonda ham mavjud.