Oʻzbekiston Qozogʻistonga insonparvarlik yordami yubordi
Shavkat Mirziyoyevning topshirigʻiga koʻra, Qozogʻistonning suv toshqinlaridan jabr koʻrgan hududlariga gumanitar yordam yuborildi.
Oʻzbekiston Prezidenti Shavkat Mirziyoyevning topshirigʻiga muvofiq Qozogʻiston Respublikasida yuz bergan suv toshqinlari oqibatida zarar koʻrgan aholiga insonparvarlik yordami yuborildi.
Insonparvarlik yordami yukini shakllantirish hamda belgilangan manzilga yetkazib berish bilan bogʻliq tashkiliy masalalarga qaratilgan Vazirlar Mahkamasining farmoyishi qabul qilindi.
Insonparvarlik yordami yukini Oʻzbekiston Respublikasi Prezidentining maslahatchisi T.Xudaybergenov boshchiligidagi ishchi guruh Qozogʻiston Respublikasiga yetkazib beradi.
15 ta katta yuk hajmli avtoulovlardagi insonparvarlik yordamida oziq-ovqat mahsulotlari, ayollar, bolalar va erkaklar ust-bosh kiyim-kechaklari, koʻrpacha, yopingʻich, yostiqlar, gigiyenik vositalar, maxsus qurilmali chodirlar, rezina qayiq toʻplamlari va boshqa zarur mahsulotlar oʻrin olgan.
Eslatib oʻtamiz, Ural daryosining toshishi oqibatida Qozogʻistonning oʻnga yaqin viloyatida toshqinlar kuzatildi, yuz mingdan oshiq inson evakuatsiya qilindi.