Dushanbeda Oʻzbekiston elchixonasining yangi binosi ochildi
Ikki davlat rahbarlari ramziy tasmani kesib, diplomatik vakolatxona binosini ochib berdilar.
Oʻzbekiston Prezidentining Tojikistonga davlat tashrifi doirasida mamlakatning Dushanbe shahridagi elchixonasi yangi binosining tantanali ochilish marosimi boʻlib oʻtdi.
Davlat rahbarlari ramziy tasmani kesib, Oʻzbekiston diplomatik vakolatxonasi binosini ochib berdilar. Ikki mamlakat davlat madhiyalari yangradi.
Prezidentlar elchixona binosida diplomatlar uchun yaratilgan sharoitlar bilan tanishdilar.
Elchixonada mamlakatlarimiz oʻrtasidagi koʻp qirrali strategik sheriklik va ittifoqchilik munosabatlarini yanada rivojlantirishga qaratilgan ishlarni samarali tashkil etish uchun barcha sharoitlar yaratilgan.
Shavkat Mirziyoyev va Emomali Rahmon elchixona Faxriy mehmonlar kitobiga oʻz tilaklarini yozib qoldirdilar.