Navoiy hokimi turli maqsadlar uchun 2,5 mlrd. soʻmga yaqin pul ajratdi

Navoiy viloyati hokimi Normat Tursunov mablagʻ ajratish boʻyicha yangi farmoyishni imzoladi. Farmoyishga koʻra, "kechiktirib boʻlmaydigan va boshqa xarajatlar uchun" 2 mlrd. 356 mln. soʻm pul ajratiladi. Shundan 2,3 mlrd. soʻm yil boshida aniqlangan qoldiq manbasi hisobidan, 56 mln. soʻm esa viloyat mahalliy byudjeti zaxira mablagʻi hisobidan ajratiladi.

Farmoyishga ilova qilingan jadvalga koʻra, pullar quyidagicha sarflanadi:

Navbahor tumanidagi ichimlik suvi tarmogʻini taʼmirlash uchun 500 million soʻm, Yozuvchilar uyushmasi viloyat boʻlimiga 56 million soʻm, Qiziltepa maktabgacha va maktab taʼlimi boʻlimiga 1 mlrd. 350 mln. soʻm, Navoiy shahar obodonlashtirish boshqarmasiga jami 300 million soʻm, Qiziltepadagi maktab-internet uchun 150 million soʻm ajratiladi.

Xalq deputatlari Navoiy viloyati kengashi navbatdagi sessiyada mazkur mablagʻlari sarflanishi masalasini koʻrib chiqadi.

Avvalroq Sirdaryoda hokimlik xarajatlari va Boyovut tumani uchun katta pul ajratilgandi.