Andijonda 20 ta maktab va bogʻcha binosi buziladi
Qaror qurilish sohasida nazorat inspeksiyasi xulosasi va taʼlim boshqarmasi xatiga asosan qabul qilingan.
Andijon viloyati hokimi Shuhrat Abdurahmonovning qarori bilan viloyat maktabgacha va maktab taʼlimi tizimidagi yaroqsiz holatda boʻsh turgan davlat obʼektlari buziladi.
Qaror viloyat qurilish sohasida nazorat inspeksiyasi xulosasi va Maktabgacha va maktab taʼlimi boshqarmasi xatiga asosan qabul qilingan. Unga koʻra, 20 ta bogʻcha va maktab binosi buziladi. Taʼlim boshqarmasi binolarni buzishdan olingan yaroqli materiallarni balansda saqlovchi tashkilotlarga kirim qilishni taʼminlaydi. Buzishdan boʻshagan yer maydonlari taʼlim boshqarmasi balansida qoldiriladi.
Buzilishi belgilangan binolar viloyat boʻyicha 20 ta, shulardan ikkitasi Andijon shahrida joylashgan. Andijon tumanida bitta, Asakada, Boʻston, Jalaquduq, Marhamat va Oltinkoʻlda ikkitadan, Shahrixonda esa uchta obʼekt buziladi. Shuningdek, Paxtaobod, Xoʻjaobod, Izboskan, Qoʻrgʻontepada bittadan bino buziladi.