"Salimboy" 6 yilga qamaldi
Tayinlangan jazo umumiy tartibli koloniyada oʻtaladi.
Xalq orasida Salimboy nomi bilan tanilgan Salim Abduvaliyev Jinoyat kodeksining 248-moddasi (oʻqotar qurolning, oʻq-dorilarning, oʻqotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 2-qismida nazarda tutilgan jinoyatni sodir qilganlikda aybdor deb topilib, 6 yil muddatga ozodlikdan mahrum qilindi.
19 mart kuni jinoyat ishlari boʻyicha Mirobod tumani sudida S.Abduvaliyevga oid jinoyat ishini koʻrib chiqish boʻyicha sud jarayoni yakunlanib, sud hukmi eʼlon qilindi.
Eʼlon qilingan sud hukmiga muvofiq S. Abduvaliyev Jinoyat kodeksining 246-moddasi (kontrabanda) 1-qismi bilan jinoiy javobgarlikka tortish muddati oʻtib ketganligi sababli jinoiy javobgarlikdan ozod etilib, jinoyat ishining shu qismi Jinoyat-protsessual kodeksining 84-moddasi (ayblilik toʻgʻrisidagi masalani hal qilmay turib jinoyat ishini tugatish uchun asoslar) 1-qismi 1-bandiga asosan tugatildi.
Tayinlangan jazoni umumiy tartibli koloniyada oʻtattirilish belgilandi.
U 2023 yil dekabrda qoʻlga olingan edi.