Navoiyda oʻquvchilarning dars vaqtida ommaviy ravishda sochi olindi
Bolalar ombudsmani holat yuzasidan munosabat bildirdi.
Bugun, 23 fevral kuni OAVda "Navoiyda maktab oʻquvchilari dars payti sport zalga yigʻilib, sochi olindi" sarlavhasi ostida maʼlumot tarqaldi.
Aytilishicha, ommaviy soch olish tashabbusi maktab direktoridan chiqqan.
Holat Bolalar ombudsmani tomonidan oʻrganilmoqda.
"Maktab maʼmuriyati tomonidan bunday harakatlarga mutlaqo yoʻl qoʻyib boʻlmaydi. Birinchi navbatda, bu umumiy oʻrta taʼlim muassasalarining odob-ahloq qoidalariga zid. Muhimi esa, bu bolaning Konstitutsiyada kafolatlangan shaxsiy daxlsizlik huquqi hamda uning shaʼni va qadr-qimmati hurmat qilinishi huquqiga tahdid soladi. Mazkur harakatga yoʻl qoʻygan masʼullarga nisbatan tegishli chora koʻrilishi zarur", - deya taʼkidlanadi Bolalar ombudsmani bayonotida.
Hozirda bu kabi nomaqbul holatlarning boshqa taʼlim muassasalarida ham yuzaga kelmasligi boʻyicha choralar koʻrilmoqda, deyiladi xabarda.