Madaniyat vazirining mashinasi odam urib yubordi
Hodisa Andijon viloyati Qorasuv shahrida sodir boʻlgan.
Ijtimoiy tarmoqlarda madaniyat vaziri Ozodbek Nazarbekovning xizmat avtomobili velosipeddagi yoʻlovchini urib yuborgani videosi tarqaldi.
Madaniyat vazirligi matbuot xizmati mazkur hodisa yuzasidan bayonot berdi.
Mazkur hodisa joriy yilning 16 fevral kuni Andijon viloyati Qorasuv shahrida sodir boʻlgan.
"Jabrlanuvchi zudlik bilan shifoxonaga olib borildi. Shifokorlar unga tezkor tibbiy yordam koʻrsatishdi. Tekshiruvlar natijasida yoʻlovchining sogʻligʻi bilan bogʻliq jiddiy, xavotirli holat yoʻqligi aniqlandi.
Zaruratga koʻra, albatta, bu borada yana qoʻshimcha axborot beriladi. Shu oʻrinda, yurtdoshlarimizdan yoʻlda harakatlanish madaniyatiga qatʼiy rioya qilishlarini soʻrab qolamiz" deyiladi vazirlik xabarida.
Oʻz navbatida shaxsan Ozodbek Nazarbekovning oʻzi jabrlanuvchining holidan xabar olgan.