Fevralda beqaror ob-havo boʻlishi kutilyapti

Joriy yilning fevral oyida Oʻzbekiston aholisini qanday ob-havo kutmoqda? Gidrometeorologiya xizmati ehtimoliy ob-havo maʼlumotini taqdim etdi.

Umuman olganda, fevral oyi odatdagidan biroz iliqroq boʻladi. Oʻrtacha oylik havo harorati meʼyor atrofida boʻlishi kutilmoqda, baʼzi joylarda meʼyordan 1-1,5^oga yuqori boʻlib, 2-4^o iliqni, shimolda 2^o sovuq-1^o iliqni, janubda 6-8^o iliqni tashkil etadi.

Fevral oyining boshi nisbatan sovuq boʻladi. Birinchi besh kunlikda havo harorati asosan kechalari 0-5^o sovuq, kunduz kunlari 2-7° iliq, baʼzi joylarda 0-2°sovuqqacha boʻladi.

Yomgʻir va qor koʻrinishidagi yogʻingarchilik 1 fevral va 4 fevral kunlari respublikaning markaziy va sharqiy viloyatlarida, 3 fevralda janubiy viloyatlarida boʻlib oʻtadi.

Ikkinchi besh kunlikda harorat kechalari 0-5^o iliqqacha, kunduz kunlari 8- 13^o iliqqacha koʻtariladi. 7-8 fevral kunlari asosan yomgʻir koʻrinishidagi yogʻingarchilik boʻlishi mumkin.

Keyinchalik, oyning oxirigacha, harorat kechasi 2-7^o iliqdan 2-7^o sovuqqacha, kunduz kunlari 13-18^o iliqdan 2-7^o iliqqacha, shimolda kechalari 0-5^o iliqdan 7-12^o sovuqqacha, kunduz kunlari 11-16^o iliqdan 0-5^o iliqqacha oʻzgarib turadi.

Fevral oyida yogʻingarchilik miqdori meʼyordan kam, baʼzi joylarda meʼyor atrofida boʻlishi kutilmoqda.

Iqlimiy maʼlumotlarga koʻra, respublika hududining katta qismida butun kuz-qish davri davomida fevral oyi yogʻingarchilik eng koʻp boʻladigan oy deb hisoblanadi.

Biroq, yogʻingarchilik miqdori boʻyicha, hamda, harorat tartibi boʻyicha fevral oyi juda turlicha boʻlishi mumkin.

Eslatib oʻtamiz, ortda qolayotgan yanvar oyi Oʻzbekistonda anchagina quruq keldi, faqat oy oxiriga kelib davomli yogʻingarchiliklar kuzatilmoqda. Shuningdek, meteorologlar mamlakat anomal sovuq kutilmayotganini maʼlum qilishgandi.