AQShdagi otishmada bir oilaning yetti aʼzosi oʻldirildi
Hodisa Chikagodan 60 km uzoqlikda yuz berdi.
AQShning Illinoys shtatining Joliyet shahrida sodir boʻlgan otishma natijasida yetti kishi halok boʻldi. Qurbonlar bir-biriga qoʻshni boʻlgan ikkita uyda otib oʻldirilgan. Politsiya hujumchini qidirmoqda.
Qotillikda qurbonlarni tanigan va yaqin atrofda yashagan mahalliy fuqaro 23 yoshli Romeo Nens gumon qilinmoqda. Erkakning shaxsi oʻrganilgan, u qurollangan va hanuz atrofdagilar uchun xavf tugʻdirmoqda.
Dastlabki maʼlumotlarga koʻra, halok boʻlganlarning barchasi bir oila aʼzolari boʻlgan. Hujum sabablari hozircha maʼlum emas.
Rasmiylarning aytishicha, Nens qizil Toyota Camry mashinasida qochib ketgan.
Joliyet shahri Chikagodan 60 km uzoqlikda joylashgan.
Avvalroq AQShda 90 nafardan oshiq kishi sovuqdan halok boʻlgani xabar berilgandi.