Rossiyadagi mintaqada tartibsizliklar: sobiq deputat xavotirli bayonot berdi

Boshqirdistonda blogerning qoʻlga olinishidan ommaviy namoyishlar boʻlib oʻtdi. Natijada Rossiya Tergov qoʻmitasining Boshqirdiston boʻyicha tergov boshqarmasi Baymak shahrida sodir boʻlgan ommaviy tartibsizliklardan keyin Jinoyat kodeksining ikki moddasi boʻyicha ish qoʻzgʻatdi.

Toʻqqiz kishi tartibsizliklar sabab qoʻlga olingan.

Rossiya Tergov qoʻmitasi rasmiy Telegram-kanalida eʼlon qilgan maʼlumotlarga koʻra, Jinoyat kodeksining 212-moddasi ("Ommaviy tartibsizliklarni tashkil etish va ishtirok etish"), shuningdek 318-moddasi ("Hokimiyat vakiliga nisbatan zoʻravonlik qoʻllash") ,bilan ish qoʻzgʻatilgan.

Ijtimoiy tarmoqlar va messenjerlarda Boshqirdiston aholisini Baymak tuman sudi yaqinida norozilik aksiyasi tashkil etishga chaqiriqlar tarqatilgan. Toʻpolonlarga terrorchilar va ekstremistlar roʻyxatiga kiritilgan bloger Fail Alchinov ustidan oʻtkazilgan sud jarayoni sabab boʻldi. Alchinov Ukraina urushi, shuningdek, mehnat muhojirlari haqidagi noxush gaplari uchun ayblangandi.

Muvofiqlashtirilmagan namoyish ishtirokchilari Alchinovni ozod qilishni talab qilishdi. Ular politsiya bilan toʻqnash kelishdi. Politsiya ularni tarqatishda koʻzdan yosh sizdiruvchi gazdan foydalangan.

Rossiya davlat dumasi sobiq deputati Ilya Ponomarevning taxmin qilishicha, namoyishlar Rossiyaning boshqa mintaqalariga ham tarqalishi mumkin. U Yoqutiston, Tuva, Buryatiya kabi hududlarni misol qilib keltirgan.