Prezident yigʻilishida ikki amaldor ishdan olindi
Shuningdek, Bosh vazir oʻrinbosari Jamshid Xodjayev ogohlantirildi.
Ayni paytda Prezident Shavkat Mirziyoyev raisligida eksport, investitsiya va mahalliy sanoatda 2024 yilda turgan vazifalar boʻyicha yigʻilish oʻtkazilmoqda.
Unda oʻz tizimidagi kamchiliklar va sustkashlik uchun Investitsiyalar va tashqi savdo vaziri oʻrinbosari Badriddin Abidov va Texnik tartibga solish agentligi rahbari D.Sattarov lavozimidan ozod qilindi.
Shu munosabat bilan kompleks uchun masʼul Bosh vazir oʻrinbosari Jamshid Xodjayev chorak yakunigacha oʻzgarish qilmasa, lavozimiga loyiqligi koʻrib chiqilishi toʻgʻrisida ogohlantirildi.
Investitsiya kompleksiga kiruvchi vazir va hokimlarning rejalari va natijalari sust boʻlgan oʻrinbosarlari ishdan boʻshatilib, ularga aniq KPI belgilanishi va shundan keyin bir yil muddatga shartnoma asosida ishga olinishi belgilandi. Natijaga qarab shartnoma uzaytiriladi yoki bekor qilinadi.
Eslatib oʻtamiz, ishdan olingan oʻrinbosar Badriddin Obidov tizimda 2018 yildan beri ishlab kelayotgandi.
